Naslli otlarni sun'iy urug‘lantirish bo‘yicha Markaziy Osiyoda yagona stansiya Sirdaryoda tashkil etiladi

Seminar tashabbuskori - «O‘znaslchilik» davlat korxonasi Sirdaryo innovatsion rivojlanish hududiy boshqarmasi. Unda xorijiy tajribalar bilan bir qatorda O‘zbekistonda sun'iy urug‘lantirishga berilayotgan e'tibor va imkoniyatlar alohida e'tirof etildi.

Xususan, Sirdaryo innovatsion hududida «Qorabayir ot zotining naslini yaxshilash, oziqlantirish, ko‘paytirish va ot sporti o‘yinlariga tayyorlash» mavzusidagi tijoratlashtirish loyihasi doirasida Innovatsion rivojlanish vazirligi mablag‘lari hisobidan fermer xo‘jaligida tashkil etilgan ilmiy labaratoriya va unda amalga oshirilayotgan amaliy ishlar taqdimoti ham o‘tkazildi.

Kelishuvga asosan «Minitube» kompaniyasi «Yaksart tulpori» naslli yilqichilik fermer ho‘jaligini yuqori samarali otlarni sun'iy urug‘lantirish uskunalaridan iborat laboratoriya liniyasi bilan ta'minlaydi.

«Mazkur loyiha amalga oshgach, fermer xo‘jaligimiz negizida Markaziy Osiyoda yagona bo‘lgan naslli otlarni sun'iy urug‘lantirish stansiyasi tashkil etiladi, - deydi «Yaksart tulpori» naslli yilqichilik fermer xo‘jaligining zootexnik-seleksioneri Suhrob Begmatov. - Stansiyada asl zotli qorabayir otlarining urug‘lari olinadi, laboratoriya sharoitida olingan urug‘lar tahlil qilinadi va qadoqlanadi, shuningdek - 196 gradus sovuq haroratda, suyuq azotda uzoq davr, hatto ming yilgacha saqlanadi. Natijada zot buzilmaydi, qolaversa, naslli otni ko‘paytirish xarajati va vaqti qisqaradi. Ya'ni, deylik, naslli ayg‘ir besh yilda nasl olishga tayyor bo‘ladi. U shu yoshga yetguncha ancha mablag‘ sarflanadi, mehnat qilinadi. Eng muhimi, sun'iy urug‘lantirish natijasida zotdor otlardan uzoq yillar davomida nasl olish kafolati yuqori bo‘ladi. Yana bir jihati, laboratoriyaning chuqur tahlillaridan o‘tgan urug‘lardan tug‘iladigan qulunlar kasalliklarga chidamli bo‘ladi. Ushbu jarayonda sanitariya-gigiyena qoidalariga to‘liq rioya qilinadi».