«Jizzax Organic» O‘zbekistonda sut ishlab chiqarishni sezilarli darajada oshiradi
Aziz Voitov Jizzax viloyatining bir qator tumanlaridagi qishloq xo‘jaligi obyektlari faoliyati bilan tanishishni boshladi. Tashrifdan ko‘zlangan asosiy maqsad viloyatning qishloq xo‘jaligi sohasida foydalanilmayotgan imkoniyatlarini o‘rganish, ularni amalga oshirish mexanizmlarini ishlab chiqishdan iborat.
Aziz Voitov «Jizzax Organic» mas’uliyati cheklangan jamiyati faoliyati bilan tanishdi. Ayni paytda jamiyatning 3560 gektar yer maydoni bo‘lib, bu yerda 10 ming bosh qoramol boqilmoqda. Korxonada 1000 dan ortiq ish o‘rni yaratildi. «Jizzax Organic» korxonasidagi ishlar to‘liq quvvatga o‘tkazilgach, bu nafaqat sut va go‘sht yetishtirish hajmini sezilarli darajada oshirish, balki respublikada naslli qoramollar sonini ko‘paytirishga xizmat qilishi rejalashtirilgan.
Aziz Voitov Sharaf-Rashidov tumanidagi fermer xo‘jaliklari, paxta klasterlari va qishloq xo‘jaligi korxonalari rahbarlari bilan ham uchrashdi. Yig‘ilishda ishsiz fuqarolarga qishloq xo‘jaligi uchun yer ajratish, yoshlar bandligini ta’minlash, shuningdek, fermer va klasterlarni rivojlantirishning dolzarb masalalari muhokama qilindi. Muhokama qilingan masalalar yuzasidan tegishli topshiriqlar berildi.
